MENG KUI CAFE 正宗興化面线

酒店虽然有提供自助早餐，但好客的古晋朋友Gary話要带我哋去試當地的早餐-興化面线，我聴到當然赞不绝口啦~ XD 用餐地點距离酒店唔远，一上车，转几个弯就到咗！

其实古晋只係一個小城市，去邊都唔驶十五分鐘，对吉隆坡人嚟讲係“非常近”，但对古晋人嚟讲就有啲远，就连停顿在红绿燈三分鐘佢哋都話塞车，哈哈哈~ 我开始羡慕古晋人悠悠自在，不受繁忙交通影响的生活方式，試問我哋吉隆坡人每日花几多时間系路上？ 唉~可悲！

位于Abell Road 的茗贵茶餐室以美味道地及興化面食出名，所以嚟呢度你可以一次过试齐所有古晋的面食，例如话Kolo Mee，番茄炒面，番茄炒饭，福州面，興化面线，興化手打面等等。 砂捞越的代表作-干捞面Kolo Mee ，我一食就上瘾！所以几乎接落嚟的几日我都吵著話要食Kolo Mee，最终呢個四日三夜的古晋之行我就试咗三個唔同地方，唔同口感的Kolo Mee，真係走都走得心息啲，嘻嘻~ 以上呢碗出自茗贵茶餐室的Kolo Mee (RM3.00) 係我人生中第一碗Kolo Mee （第一次拜訪砂劳越），所以对佢的期望亦自然提高，話晒都聴人过甘多年，但一日未食过都唔会体验到有几好味，噢~原来真係好好好味咖！:D 點解一碗普通的干捞面会俘虏每一個砂劳越人的心？秘诀好简单，就係面条！Kolo Mee的面条同云吞面完全唔一样，佢望落有啲似即食面的形状但弹性十足，口感一流！然后配上适量的肉碎，炸葱，青葱，叉烧及简单调味料，一碗美味的Kolo Mee就此完成。"Less is more" 真係唔係人人都做的到，好多厨师或食客都以为越多料就越好，乜都加晒落碗嘢度，最后美食不成，变成垃圾！我好庆幸可以係古晋品尝到一碗甘正宗，原味同高水准的Kolo Mee。= )

我对興化面线的喜爱层度可谓一见锺情！（绝对冇夸张）先論卖相，我俾佢满分，因为就算你係吉隆坡俾二十蚊都未必能食到咁靓咁丰富的面线，更何况佢只卖RM4.50! 材料虽简单但极度新鲜，有鲜甜的中蝦，肥厚鱼肉，切丝煎蛋，冬菇丝，鸡肉，紫菜，青葱，青菜同埋花生粒，而且分量充足。面线味道较为清淡，好似只有少许酱油加胡椒粉的味道，不过配合其他材料一齐食就啱啱好。唯一遗憾就係呢個面线有D干，如果多些少汁会更好，建议享用时加番几羹清湯就完美啦！
人人一碗興化面线！:D 好过瘾！
古晋的传统奶茶就如杯上的标志一样，掂啊！

在面线上加少许砂劳越胡椒粉会更好味咖！:)

興化炒手打面(RM6.00)- 手工面条形状如同乌冬面，质感软滑，而且容易咬断，唔会令人有难消化的感觉。材料类似興化面线，有鲜蝦，鸡蛋，紫菜，冬菇，鱼肉及蔬菜，而且分量大方，绝对物超所值。我個人相當喜爱佢嘅味道，清淡得嚟带點锅气，最重要就係佢一D都唔油腻，食完之后都冇半點内疚，哈哈！

興化面线特写，我再一次流口水 ~~~ XD 我誓要返嚟古晋多食多一次kolo面同興化面线！

我唔单止第一次食興化面线，興化手工面，亦係第一次食番茄河 (RM4.50)。=) 番茄河亦称为番茄粿条或Tomato Kuay Teow，煮法类似滑蛋河，主要特色當然係由番茄煮成的芡汁，再加上鱼饼，肉丸，鲜蝦及蔬菜等材料炮制而成。睇样好似令人难接受，可能颜色的关系，但原来非常美味咖！味道比羅宋湯稍微酸，感觉就好似饮冬蔭湯般醒胃，但又唔会好似冬蔭咁辣咁伤胃，而且营养价值高，所以相當适合健康饮食主义者。^^

邊食邊倾...呢次古晋之行不得不多谢Gary的贵宾式招待，全靠佢我地先可以食到咁多隐秘的道地美食。:D

MENG KUI CAFE 茗贵茶餐室

ADD: Abell Road, 93050 Kuching, Sarawak.

OPERATION HOURS: Mon-Sat 7am-2pm