KEROPOK LEKOR BAYU TERENGGANU 丁加奴炸魚條

丁加奴(Terengganu)- 一個极平静純樸的小地方，没有大型購物商場，也没有先進娱樂設備，因為这片面积12,955平方公里的土地上只有一間戲院！（唔係呱？:S）整個州只有一間戲院呢個事實真係令我覺得十分之驚訝，到底係政府要保留十年如一日的kampung feel而唔想有發展或是係唔想啲人民進步？相信大家感覺疑惑的同時亦心中有數。

雖然瓜拉丁加奴的發展平平，不過幾個知名小島就得到唔少本地同外國游客的喜爱，講紧的小島就係因电影《夏热麽麽茶》而爆紅的熱浪島(Pulau Redang)，停泊島(Pulau Perhentian)，浪中島(Pulau Lang Tengah)以及棉花島(Pulau Kapas)等等。丁加奴除咗漂亮小島值得被人好好宣揚之外，仲有一樣嘢係我覺得絕對可以介绍俾所有到訪丁加奴的朋友，就係即傳統又有代表性的炸魚條(Keropok Lekor)。如果話芙蓉有燒包，槟城有豆沙餅，怡保有香餅，咁丁加奴的代表小食就非炸魚條莫属。炸魚條的外表雖然有啲核突，不過勝在口感正，味道好，所以會不知不覺越食越多嘎！建議大家要趁熱食，否則魚條的質感會變硬，而且會有啲腥味。:P

Keropok Lekor Bayu 坐落于Kampung Baru Merang 大路邊，距離我們住的渡假村只係短短三分鐘車程，所以係未進入渡假村之前我們就叫德士司機停一停車俾我們落去買炸魚條。:) 製作魚條步驟：1.混合新鲜魚肉+盐+麵粉+水，然後打成魚胶。2. 将魚胶搓成條状，在魚條表皮上掃上一層麵粉。3.将魚條放入滚水中煮熟定型。 4.煮熟之後的魚條可以即刻享用或者經過油炸而變得更加香脆可口。 當我係度影紧呢位笑容璨爛的姑娘炸魚條時，老闆亦不甘落後地舉起相機反拍我。:)
除咗鲜炸魚條之外，顧客亦可以係呢度買到未炸的包装魚餅、蝦餅及墨魚餅，带返去同家人朋友一齊品嘗。

你認為足够二人享用的炸魚條份量大概係幾多？10條？20條？我們二人在两日之内食咗45條！XD 搞到依家對炸魚條有恐懼症！

炸魚條係道地傳統小食，價錢當然亦非常平民化，只需1蚊马币就可以買到5條(RM1= 5pcs)，超抵食！换言之45條都只係區區的9蚊，真係可以将佢列為"1 Malaysia"食物。XD

香脆的外皮，QQ的魚肉，獨家秘製酸辣酱...炸魚條(Keropok Lekor) 係丁加奴的光榮，亦是我係丁加奴咁多日食過最好味的食物。（不過由于過量服食，所以導致我患上了炸魚條恐懼症 Fobia Keropok Lekor，短期之内都不能再接觸呢個食物）XD

Keropok Lekor Bayu

ADD: Lot 318, Kampung Baru Merang, 21010 Setiu, Terengganu.

TEL: 019.936.8257/ 019.916.7437