IKEA 瑞典牛肉丸

我锺意行IKEA，如果你都同我一样，相信你唔会唔认识IKEA里面的牛肉丸！哈哈~可能你唔食牛肉，不过你都应该有食过佢嘅咖喱卜(Curry Puff)呱？如果都冇，咁你就真係斋行街唔食嘢，实在有D可惜，皆因IKEA唔单止家俬靓，其实食物亦好正咖!:) 虽然我唔係第一次帮衬呢间餐馆，不过就从来都冇係度影过相及po上网，而咁啱几日前行IKEA时又有相机在身，就决定影番几张放上嚟同大家重温一下IKEA最令人怀念的美食---瑞典牛肉丸... - -

IKEA餐馆/咖啡屋主要提供瑞典美食，例如鸡扒，三文治，意粉，牛肉丸及沙律，不过间中都会推出本土风味的“今日特别”(Today's special)，就如椰浆饭及砂劳越鸡饭咁嚟迎合大马人的口味。 檯檯燈燈，碗碗碟碟，所有摆设布置都係IKEA产品。 IKEA著名瑞典牛肉丸，爽口多汁，再加上秘制蘑菇汁同果酱的味道，真係好销魂~~所以我每次嚟IKEA都一定会食。 :) 建议大家另外买粒面包 (RM1) 嚟點蘑菇汁，感觉好正咖！

*牛肉丸 & 薯条：细（5粒）RM5，中（10粒）RM10，大（15粒）RM14 虽然蘑菇汁唔係主角，但係佢绝对係一個最佳配角，因为無論佢同肉丸，薯条或是面包都一样咁啱key，味道仍然等够充分发挥，相信如果配白饭都应该唔错。 XD Lipton牌红茶(RM2)，食客可以自由添热水，冇次数限制咖！ 餐馆/咖啡屋的位置身在IKEA上层的尾端，亦即是係天梯（落底层）旁边，所以當顾客行完上层之后，可以係呢度歇一歇，饮杯茶，然后再继续落下层购物。 医饱肚再继续行.... :) - --

-

IKEA RESTAURANT 宜家餐馆/咖啡屋

ADD: 2 Jalan PJU /2, Mutiara Damansara, 47800 Petaling Jaya, Selangor.

TEL: 03.77267777

OPERATION HOURS: Mon- Thu 9:00am-9:30pm Fri-Sun 9:00am-10:30pm

WEB: http://www.ikea.com.my/

JADE POT DIMSUM 令人难以抗拒的糯米鸡

雪隆区的點心茶楼数之不尽，但係可以做到材料新鲜，原汁原味，手工精制的點心茶楼真係唔多，先咪谈上海苏浙苑(JW Marriot KL)呢类天堂级的點心专家，我想话係比较平民化兼商业化的點心楼冇几间係可以做到色相味俱全的點心，就连出名人多的锦选亦未能够做到水准平均，點心味道及新鲜程度时好时坏，而且环境相當唔舒服，食完就即刻想走人。- 《JADE POT 一品锅》係我经常帮衬的火锅餐馆，食物新鲜，湯底一流，服务又好。不过原来佢哋唔单止卖火锅，仲有卖點心，听落好似九唔打八，但其实點心只限早上至下午时段，而晚上就以火锅为主。火锅好味我已经提过，但估唔到點心一样甘出色，尤其是係佢嘅糯米鸡！糯米鸡有乜甘特别唶？有，真係好特别，可以话我出生至今食过最好味的糯米鸡！我绝对冇浮夸，呢度的糯米鸡真係非常正，无论味道，糯米的黏性，亦或卖相都超越水准。虽然我本身唔係一個糯米鸡爱好者，但都被佢深深甘打动了~ 从此爱上糯米鸡...

呢度你可以揾到同一般點心茶楼唔一样的點心，例如话煎莲藕饼，海鲜纸锅，香酥南乳骨，蒸带子，陈皮红豆沙及金瓜露等比较有特色的點心。 单据消费RM50以上仲有打折，好抵食。:) 呢度冇吵杂声，冇人好似滚水爐脚甘行嚟行去，更加冇人食到大汗叠细汗，皆因环境犹如酒店餐廳甘舒服，地方宽敞，冷气够冻，而且服务效率高，唔驶食碟烧卖都要举高隻手左叫右叫好几轮。 登！登！登！登！最令人难以抗拒的糯米鸡 (RM4.90) 终于出场啦！佢散发出扑鼻的香味，散发出一份自信~ XD 鲜菇，鸡肉及糯米饭都非常入味，救命啊~~點解可以甘好食？！ 独特的蜜汁遍布整個糯米鸡，一啖未吞落肚就即刻想挟多啖！

糯米饭的软度及黏性适中，每一口都同样均匀好味。

上海煎锅贴 (RM5.80)，味道还好，不过口感就一般，可能係啲皮太厚。

锦卤炸云吞 (RM5.80)，馅料係由爽口的鲜虾肉制成，美味可口！

沾上少许沙律酱更加正~ :D

原笼双子座 (RM4.00)，感觉好似为我呢個双子座而设甘，哈哈~ XD 带子配鱼子，鲜甜无比，乃属點心中的极品。

蚝油鲜竹卷 (RM5.80)，腐皮里面的鱼肉新鲜爽口，咬落去时又啖啖蚝油汁，好过瘾！

一品鲜虾饺 (RM6.80)，虾肉的确好新鲜，不过虾饺皮就比较差，一咬就散。

我最爱之一：生煎莲藕饼 (RM6.80)，一碟有六塊甘多，都几抵食。材料係用新鲜手打鱼肉配莲藕片制成，未食就先闻到阵阵香味。:)

另一最爱：腊味芋头糕 (RM2.80)，粉粉软软的芋头糕里面有好多芋头粒及腊味粒，再加上新鲜蒸起，所以味道更胜一层，同一般摊冻咗的芋头糕係好唔同咖~

菜胆鲜鱼卖 (RM4.80) 弹牙又结实，而且一啲腥味都冇。

除咗以上几款小點，呢度亦有好多特别的大點，譬如话金菇肥牛纸锅，黄酒鸡，潮式鱼头米及粤式细蓉等等,我下次一定会试！ =)

海味纸火锅，睇落几吸引...

地方宽敞，一家大细嚟都冇问题啦！

一品锅 JADE POT RESTAURANT

ADD: No.413, Batu 5, Jalan Klang Lama, Kuala Lumpur. (NEWCOM楼下)

TEL: 03.7987.9918

LE PARFUM DE BLE 中日韩合璧之泡菜牛肉拉面

巴黎有好多日本人，我所谓的“多”你可能想像唔到有几多，就等我举個例子：如果话法国餐馆的数量係巴黎排第一，咁日式餐馆就係排第二。再举多個例子：购物商场的指示都会以法文，英文及日本说明。由此可见，日本人係巴黎（法国）的位置并非一般，所以日本旅客亦特别喜欢到巴黎消费。 - -

Le Parfum De Ble 稻之香係巴黎Rue Ventadour的一间日式餐馆，不过老板唔係日本人，而係一对来自香港及广州的夫妇，亦即是中国人。點解佢地唔开间上海菜馆或者港式茶餐廳？仲驶问，巴黎咁多日本人，梗係做日本人生意啦！XD 稻之香同其他日式餐馆的不同之处就係多咗一份中华味道，皆因厨师亦係中国人，所以食物的配搭比较多元化，就如中国人煮的日式拉面配韩国泡菜，係唔係好”联合国”咧？:D-

一睇见呢個招牌就令我联想到周杰伦嗰首轻快的歌曲《稻香》。^.^ 稻之香日本餐馆的外观朴素简约，不过里面就蓝光四射，好似俱乐部咁，俾人一種与别不同的饮食气氛。 餐牌封面係一张简单而充满日式情怀的照片，睇落好舒服。 拉面选择相當多，必有一款啱你心水。 配搭好"fusion" ，难以想像牛肉乳酪（芝士）拉面的味道.... :P 天气咁冻，最好就係饮东蔭功 (Tom Yum)，不过巴黎的泰式餐馆邊有日式餐馆咁普遍 ，所以我最后就选择咗味道与东蔭功类似的泡菜牛肉拉面 Euro 9，同样都係酸酸辣辣，食完之后全身的体温即刻提升，正啊～ 咁“蓝”的日式餐馆都係第一次见识。XD 叉烧拉面套餐- 湯水的味道偏于中式，同一般日式餐馆饮开D味噌湯好唔同，可能係因为出自于中国厨师的关系，所以出嚟的效果亦好"fusion"。整体口味虽然OK，不过始终不及我几日前去嘅一间日式餐馆咁出色。 开胃前菜-腌青瓜菜丝, 好味！:D

一個靓日式饺子应该係一面皮脆，一面皮软，然后里面D肉馅鲜甜多汁。可係呢度嘅饺子煎得唔均匀，而且里面亦稍为干，有失口感。

日式蒜米炒饭，同样地亦加入咗“中国元素”-青豆，搞到似杨州炒饭多过似日式炒饭。XD 最重要的蒜米又落唔够，所以未能散发出蒜米炒饭嗰種独特的香味。

Le Parfum De Ble 稻之香

ADD: 8 Rue Ventadour 75001 Paris, France.

TEL: 0140 1598 65

CAFE PALAIS ROYAL 巴黎，早晨！

“巴黎，早晨!” 今日的巴黎没有阳光普照，只有细雨绵绵，令我踏出门口第一步又有衝动想返入棉被里继续发梦。:P 好在 "食欲" 够争气，所以就算天气再坏我都唔会放过任何一個与美食打交道的机会，更何况係巴黎早餐！XD 一杯热咖啡，一個法国包，一份报纸...这就是法国人的生活。 -

巴黎到处都係咖啡屋，而且檯凳都係并排咁摆置于咖啡屋外，顾客可以邊嘆咖啡，邊欣赏街景，写意都不得了啊！:) 可惜今日落雨，所以我哋惟有係室内享用早餐，透过窗口观赏雨景。 Cafe Palais Royal 的燈饰及墙纸都係同色同花纹，衬到绝！:) （左）英式早餐餐牌 （右）普通餐牌（又係同燈饰及墙纸一样款咖 :D） “巴黎版的英式早餐”价值Euro 12 一份，套餐包括三片多士，一塊总统牌牛油 (President)，两粒煎蛋，火腿，一杯橙汁以及一杯咖啡/热茶。味道唔错，不过配搭唔够丰富，若然加入肠仔，蘑菇及蕃茄就真係冇得弹啦~ XD 咖啡屋用嘅係Florio牌子的咖啡豆，所以可见咖啡杯及包装糖都印有佢嘅logo，大打广告。 英式早餐始终都要係英国食，而係法国当然係要食法国面包啦！所以我點咗呢嗰特长的"皇家三文治" (Sandwich Royal) Euro 7.5 ，材料非常新鲜吸引，有熏肉，鸡蛋，芝士，青瓜，番茄及生菜。营养丰富，口感一流！ 满足感 100% 。 想减肥的朋友可以考虑呢嗰“不含碳水化合物”的早餐- 火腿煎蛋 (Omelette Jambon)、Euro 8，健康之选。 咖啡屋里面充满咖啡香，令人心情特别放松。 齐齐同面包合照留念。

喜欢黑板上的字迹...

4人早餐平均一人消费Euro 11。

门外的路牌。-

-

Cafe Palais Royal

ADD: 202 Rue Saint-Honore, 7500 Paris, France.

TEL: 014 261 3491

RESTAURANT JAPONAIS SAPPORO 人在巴黎，食在札幌

巴黎最浪漫及幸福的事係乜？巴黎铁塔下湿吻？河边撑艇？穿梭名牌专门店？或是嘆咖啡食牛角包？相信大部分人都有类似的同感，不过对我嚟讲巴黎最浪漫及幸福的事就係可以係冻冰冰的气温下同爱人享受一碗热辣辣的拉面。:D 當冬天来临时，就算十個鹅肝酱配法国包都不及一碗热到出烟的拉面嚟得矜贵。无论我身边围绕多少法式美食，我始终拥有华人的味觉，一個对于湯水非常热情的味觉，所以能够係冬天饮番啖热湯暖身就係我最理想的“浪漫与幸福”。XD

浪漫的大都市有個小札幌，令我觉得分外窝心。 :) 未食就先令人流口水~~全赖日本人的精致杰作！ 亲切的日籍老板娘为我哋落order。

法国啲饮品贵，所以都係饮免费清水好。XP 传统日式拉面一般都係以半肥瘦叉烧片为主，但係由于我唔係甘喜欢食猪肉，所以就选择咗以上呢個鲜虾拉面 (Shrimp Ramen)。睇似普通，但其实佢係一碗非常有"实力"的拉面，湯水清甜，面条爽口，而鲜虾同蔬菜的分量亦相当大方, 令我食得好过瘾！=D *极力推荐 好大碗啊~~不过我冬天时的胃口特别大，所以好轻松地就将整碗面吞咗落肚，哈哈！ 日式猪扒蛋饭 (Katsudon)，同拉面一样咁大碗夹抵食。:D 大葱及煎蛋的香味毫无保留地渗入炸猪扒的表皮，令味道及口感更升华。一個简单手势就就可以代表食物的质素，ichiban !

日本人煮的味噌叉烧拉面 (Chashu miso ramen) 一向都有一定的水准，包你唔会失望。:)

另一位朋友就选择咗口味较重的青椒牛肉拉面 (Green pepper beef ramen)，湯汁香浓，牛肉鲜嫩，好适合冬天暖胃。

多款套餐供选择。

卖食之余顺便卖埋日文报纸。:)

传统日式餐馆都会摆放一系列漫画任客人边食边睇，非常体贴。

餐馆面积唔大，可以容纳大约25-30人。

餐馆燈光温和，好舒服，有“家”的感觉。:)

Restaurant Japonais Sapporo

ADD: 276 Rue Saint Honore 75001 Paris, France.

TEL: 0140159866