Estica: September 2011

20110928

S'MORES 純粹和牛

話說幾個星期前Gary 係Groupon 網站賣咗三張價值RM39.90 的S'Mores和牛套餐劵話要請我同MengQ一齊去享受。:) 根据餐劵上的說明，呢個特惠套餐包括一塊重达200克的澳洲和牛，一碗蘑菇湯以及一杯凍檸茶，原價总值RM133！但依家只需以30%的價錢就可以将所有擺曬落肚，真係仲抵過食批薩。

不過有一句話叫做“平嘢冇好嘢”，呢度的食物水準唔單止未到家，就連服務質素都一樣咁差！尤其係嗰個外籍哨牙侍應，態度非常唔掂，佢知道我們係嚟食特惠和牛套餐，就要我們白坐咗十分鐘，直到朋友舉手同佢要求餐牌時，佢就好似黑面神上身咁就同我們攞餐劵，然後叫我們等！（等咗十分鐘仲要等？乜態度嚟嘎？）:( 朋友就即刻問佢可唔可以先俾我們睇餐牌，因為可能會加其他食物，而佢就好唔耐煩咁行開，然後由另外一名外籍侍應递上餐牌（呢個同樣冇表情，不過有問有答，勉强可以接受）。雖然我們係以優惠價享受呢份和牛套餐，但並不代表我們要接受你呢種“優惠服務態度”。

雖然已經提早訂檯，但侍應並没有為我們準備靓位，而係安排我們坐係餐廳最裡面的一張檯，一個冷氣不足又悶热的角落，並且係靠近廚房。:(

S'Mores 透過 Groupon 推出價值RM39.90 的和牛套餐包括一碗蘑菇忌廉湯（罐頭嗰種）及一杯凍檸茶，啤酒另計。

我的香草牛油烤和牛配炸薯條同菜絲沙律- 两樣配菜都做得唔错，不過主菜烤和牛就麻麻。:( 雖然我要求五成熟，但食落去的口感好似十成熟咁。“廚師，到底係你的問題或是係和牛的問題？”

我的五成熟烤和牛，味道幾香，不過肉質又硬又粗又厚，咬下咬下忽然覺得好眼訓...zzz

Gary 的蘑菇汁烤和牛配薯仔玉米沙律同炸薯條- 佢投訴話呢塊和牛外热内冷，感覺上好似預先煮好咗然後再煎返热 :S，噁～應該唔會咁衰呱？

MengQ的香草牛油烤和牛配青椒大葱沙律同薯仔玉米沙律- 佢話呢度的和牛完全冇tenderness（嫩滑），并且懐疑到底係真正的澳洲"Wagyu Beef” 或是"Wangsa Maju Beef"？！XD

單單一塊和牛又豈能满足两位男士偉大的食量啊！ XD 所以我們另外再叫多一碟香蒜雞意粉( Pesto Chicken Spaghetti)，可惜味道淡到好似忘記落盐咁，失望！

有啲餐廳只會令人幫親一次，S'Mores 就係一個“好”例子。

S'Mores Restaurant & Bar

ADD: Unit G2, Ground Floor, The Sphere, Bangsar South, 8 Jalan Kerinchi, 59200 Kuala Lumpur .

TEL: 03.2240.0069

WEB: http://www.smores.com.my/

I FEEL MAGAZINE 我在雜誌上見到我自己

9月27日晚上，某朋友突然傳咗封短訊俾我，話我上咗《i Feel》雜誌！哈？夏？蝦？你有冇搞错？我有乜可能會上雜誌？（我一向都咁低调，又從来都未接受過傳媒訪問 XD）就算真係上雜誌，我又點解唔係第一個知，而係從朋友口中得知？（拗頭）就在我半信半疑的時候，朋友就傳咗張照片過我，嘩！！！真係嚇到一下，两下... >.< 因為雜誌上的標题寫著“ESTICA <3 FOOD 热爱旅行和美食的小妮子”！（阿媽，我上雜誌啊！:P）我心里面的興奋突然爆發，就好似買萬字買咗幾十年第一次中咁，所以就即刻撥电叫爱人帮我買最新一期（十月份）的《i Feel》。:D 半個鐘之後，一份新鲜出爐的《i Feel》就擺在我面前，我第一次在雜誌上見到我自己...

上报或上雜誌可能對好多人（尤其係藝人同有錢人）嚟講係一件平常事，但对于一個平民百姓兼從来都冇唸過自己的部落格會被雜誌编辑選中介紹的我嚟講就係一件不平常事，而且仲係全頁撰稿，所以想扮镇定，扮到若無其事咁都好難（我明明就係又驚又喜）。:P

我的部落格没有如詩如畫的詞句，只有生活化的大馬式廣東話，但依然得到编辑的喜爱推薦，實在係我的榮幸。多谢Stanley，多谢《i Feel》!

好多朋友知道呢個消息之後都留言恭喜我『出名』喇！但其實我從来都冇唸過要出名或覺得自己上咗雜誌就等于成名了，我只不過係一個胃食猫 :) ，一個喜歡尋找美食兼热爱生活的大馬人，想同人『分享』才是我寫呢個部落格的真正原因。:)

Sharing is Loving. <3

20110923

MATSUBA SHOKUDO 日本公寓偷食記

我已經唔係第一次嚟呢度偷食...自从第一次同Matsuba接觸之後，我就开始流連于这個公寓，有時一個星期一次，有時一個月一次，原来係公寓偷食係咁刺激嘎！

若然你想交個日本男朋友或女朋友，不妨多啲嚟呢度食嘢，或者索性搬嚟呢度住，因為呢棟公寓的住客以日本人居多，我嚟過好幾次都唔見有幾個本地華人，更加唔好話有黑人、孟加拉人、中國人等其他外籍人士係呢度出現，所以係一個相當“日本”的高尚公寓。:) 日本人住的公寓果然唔同啲，唔單止環境清潔幽静，就連裡面的食堂都係一間似模似樣的日式餐館（好羡慕）。有時後媽咪冇煮飯或親戚朋友拜訪時，都可以嚟呢度飲杯清酒，食塊壽司，幾咁享受。（幻想）XD 雖然我都係住公寓，但係我樓下的食堂唔係賣日本餐，而係經濟米粉同大炒。:P

就係呢個肥仔-Matsuba，令我毫無矜持咁自動送上公寓。雖然話係公寓裡面的食堂，但食物選擇及質素方面絕對唔随便，基本同上購物商场的裡面的日本餐館冇乜分别。
两款傳統壽司- 玉子壽司 (Tamago Sushi RM5) & 三文魚 (Sake Sushi RM6)。低调的環境配搭温和的燈光及幾桌品酒的日本食客，感覺就如時光倒流般身在八、九十年代的日本小餐館，給人一種不能言喻的親切感同舒適。:) 在呢個moment嚟一個軟壳蟹手捲 (Soft Shell Crab Temaki RM8) 就更加係ichiban! :D 呢個並非一般的拉麵（雖然賣相一般），因為佢係一個超大碗兼用咗12種材料製成的拉麵 (Gekikara Ramen RM15)，搞到我好似食咗好耐都食唔完咁 XD ，越捞越多嘢，建議二人享用會比較好。12種材料：天婦羅蝦、豬肉片、東菇、蘑菇、蟹柳、墨魚、大白菜、青菜、紅蘿蔔、竹筍、大葱以及鵪鶉蛋，嘩～真係多到好似将一日三餐捞埋一齊食咁！湯底方面香辣濃郁，非常開胃，而麵條亦新鲜爽口，整體令人满意。邊食邊尋寶... 招牌便當（Matsuba Bento RM32 ）- 三款刺身，鳗魚飯，天婦羅蝦+蔬菜，沙律及味噌湯。無論賣相同味道都一樣咁掂！朋友食完之後，仲打包咗一套返去俾老公，真係貼心。傍晚時分的公寓十分清静，泳池周圍都唔見有人，食飽之後可以出嚟透啖氣，食支菸（唔係我食:P)。

Matsuba Shokudo

ADD: OBD Garden Tower Condo, 300-0-4, Jalan Desa Utama Off Jalan Kelang Lama, Taman Desa 58100 Kuala Lumpur.

TEL: 03.7987.7088

20110922

GARDENIA DELICIA WAFFLES 即食威化餅

著名麵包品牌Gardenia 又推出新產品啦！呢次唔再係葡萄乾麵包、忌廉布朗尼或沙丁魚包仔呢啲例牌嘢，而係令我眼前一亮的即食威化餅(Waffle)！睇嚟Gardenia今次真係落足心思要捍底其他對手噢！當其他品牌，例如High 5、Massimo、Mighty White仲係度賣紧方形麵包同忌廉包仔的時後，Gardenia 早就生產一系列不同類型及口味的麺包嚟Hold著整個市場，至於今次生產威化餅足以再一次証明Gardenia的势力强大，其他對手想跟都好難。:P

Gardenia 新推出的威化餅有两種口味-楓樹糖浆全麦及經典肉桂，一包只賣RM1.40。

一包裡面有两塊獨立包装的威化餅，方便随时随地享用。

威化餅的口感好似麵包咁軟，而且有啲乾，所以都係烘一烘會比較好。

包装上建議将威化餅烘热，然後搽上牛油或雪糕作為甜品。

20110915

TERY PORK KAFE 豬羅記PART II之石頭豬豬

今日再次到訪Tery Pork Kafe係受老闆之邀試食新菜式，佢話要答謝我咁落力推薦Tery Pork俾大家，将佢間餐館寫得咁好。:) 其實我想同老闆講；“你唔好咁客氣喇！就算你唔邀請我去食免費餐，我都會再光顧你間餐館，因爲只要係好嘢，我都一定會带同親朋戚友一齊返去食，而價錢根本就不再考虑範圍之内。”不過，既然老闆咁有誠意offer，我當然不客氣咁带咗两位幸運儿:P 嚟同我分享今晚的“南門豬宴”，等两位亦能将此餐館的美食好好咁宣揚出去，免得辜負老闆的一番好意，嘻嘻～

舆老闆交談當中，我明白到老闆的對於食物質素的要求同堅持，亦知道老闆對於廚師伙伴及整體運作都充满百分百的信任同信心，如此正面的態度，相信老闆要達到的心願一啲都唔難。到底老闆有乜心願？請看下。

（食完呢餐豐富的晚餐後，我去訪問咗两個不曾去過Tery Pork的朋友）

ET-我，AL-三十出頭的中女，BD-三十左右的男人

ET: 唸到食猪肉，你會去邊？

AL: 梗係 El Cerdo 喇！(好懂得享受，不過每片豬火腿逐克計算，相當喇脷。:S)

BD: 寶香肉骨茶！(果然係正宗的chinaman，一講到豬肉就即刻唸到肉骨茶。XD)

然後佢地又反問我，而我就答：Tery Pork 囖！:) < 这就是老闆的心願，希望人人一想到食豬肉，就會即刻想起Tery Pork，雖然現階段並未有很多人認識此餐館，但至少已經有一個成功的例子。

其實老闆早就為我們準備咗今日的餐單，所以我們根本唔駛浪費睇餐牌，但我就大膽咁同老闆指定話我要有上一次我試過的蜜汁排骨拉麵，因為呢個麵實在太好味，我不能不重温兼同我身邊呢兩位分享嗰種非一般的味道。今日的排骨拉麵好明顯落重料 :P（多謝老闆！我完全能感受到Tery Pork的誠意），有三塊排骨+两片熏肉+ 一粒荷包蛋咁豐富。嘩～一食之下，真係不得了！好似比上一次仲好味咁，應該係材料份量多咗的關系，所以味蕾受到更大的刺激。我們三人你一啖，我一啖，唔駛五分鐘就帮佢“洗碗”！XD 美味層度由此可見。

眼前呢一塊烤大排骨 (RM40)，色澤亮麗，香氣逼人，誘惑力十足，但你是否能想像佢嘅味道？HP Sauce的味道? 黑胡椒的味道？其實統統都唔係，老闆話排骨唔係用一般西式酱料處理，而係日式酱料，難怪味道如此特别！個人覺得好似港式叉燒汁同日式照燒酱的混合體，又香又惹味，而且肉質厚實不肥腻，徹底咁改變我對傳統豬扒/豬骨油淋淋同豬騷味很重的印象。此烤排骨可謂我呢年来見過最有水準的Fusion作品，亦係又一個令我會再返去帮襯的堅定理由。

其實要用字眼去形容一樣食物有幾好味係一件相當困難的事，但一圖勝千言。:D

咦？點解又係拉麵？ XD 皆因大家都覺得唔够喉，所以我就同老闆要多碗熏肉拉麵！“老闆，唔係我們貪心，而係師傅煮麵煮得太好喇！”*俾老闆一個小建議，不妨係餐牌上放上“厨師推薦Chef's Recommendation ” （或者“Estica's Recommendation" ）的標誌，哈哈！

今日的主角，亦係Tery Pork 在11月即将推出的新菜式- 石頭豬豬 (Stone G RM18.90)，一個混合日韩元素的豬肉片燒烤，新意非凡，啱曬喜歡DIY的現代人。:) 首先，老闆将一大塊肥豬油放在高温石頭上，然後待至溶化。

當石頭铺上一層溶化了的豬油時，我們就可以将一片片晶瑩剔透的豬肉片擺上去烤。肥瘦分明的三層肉片在高温之下發出”霹雳吧啦”的聲音，好刺激（好好玩）！=D

老闆親自示範，大家好似睇紧烹飪節目咁。XD

大家都眼金金望著呢片即将烤熟的豬肉片，（攞命）好香啊～～

嗒哒！将所有材料-豬肉片，韩國泡菜，日式味噌，蒜米片，葱，青瓜連同生菜包著一齊食，美味健康，口感甚佳。

Karen 不喜歡食泡菜，所以佢對呢個石頭豬豬不感興趣，但就對拉麵贊不絕口，仲話要带老公嚟食。

食咗咁多肉氣，係時侯食返啲甜品中和一下腸胃的酸性。老闆話新餐牌上即将會加入一系列甜品，好讓客人可以體驗更加完整的飲食過程-前菜>主菜>甜品。以上呢款甜品可算一個清新的組合- 烤圆筒麵包配搭香草雪糕，朱古力酱，忌廉同密瓜，但我個人就覺得有啲over，如果可以做迷你版本或選用威化餅(waffle)會比較好。

我偷偷地影底新餐牌的某一頁同你分享，要豬豬或要菇菇，你就要係11月的時侯親自去Tery Pork爭取，若然豬豬同菇菇都俾人搶曬，你大可以同老闆要求一個“抱抱”！XD

Tery Pork Kafe

ADD: C-1-6, Level 1, Block C, Pusat Kommersial SouthGate, No2., Jalan Dua off Jalan Chan Sow Lin, 55200 Kuala Lumpur.

TEL: 014.2366.355

FACEBOOK

豬羅記 PART I

20110907

THE GEOGRAPHER ADVENTURE 酒吧裡面真係有廣府炒

8月23日，我們三人放工後又約埋一齊去食晚餐...

（GT- Gary， MY-MengQ Yek，ET- 我）

GT: Toink，今晚想去邊度食啊？(你唔好問我點解我會被叫做Toink:P)
ET: 唔.....不如去蒲種喇！我們都未試過一齊去蒲種食過嘢。
GT: 蛇仔，你ok冇？
MY: ok! 家姐話事喇！
GT: 咁去蒲種食乜嘢啊？
ET: 可以考虑食炒薯粉，炒白粿...或者Kissaten。
GT: 啊～不如我們去嗰間新開嘅Geographer喇！
ET: 哈？馬六甲嗰間Geographer喔？有嘢食嘅咩？
GT: 有啊...
ET: 睇怕都係D煎炸小食。（唸到都冇胃口）
ET: 好喇，就去睇下有咩食喇，如果冇嘢食就轉場呀！（最好冇嘢食，因為我今日突然好想食廣府炒，最好就係轉場去食大炒喇！XD）

————————————————————

到達Geographer的時侯大約係晚上7點鐘，由於時間尚早，所以只有蝦毛幾隻。我翻開擺在酒吧大們前的餐牌，心唸都應該係炸薯仔、炸腸仔呢D小朋友食嘅西餐，邊可能有好嘢食嘎，更加唔好講有中式大炒。結果，我的預测完全错了! :S 我實在唔應該自以為是咁睇小呢間酒吧，我更加唔應該将佢歸類為Overtime之類的酒吧，因為Geographer的飲品同食物選擇都非常多，XD 有意大利式、越南式、日式、泰式、馬来式...食物種類多到好似一個聯合國餐廳咁！而最令我大跌眼镜的地方就係佢竟然有廣...府...炒！啊~~~~~痴線嘎！一個咁摩登的酒吧點解會無喇喇有廣府炒嘎？！係呢度食廣府炒唔會好怪咩？飲啤酒配廣府炒逻辑咩？如果我叫廣府炒，隔離D人會唔会覺得我好老土？唉～我唔理啦！坐底先算.....

蒲種係一個乜都多的地區- 屋多、車多、人多、银行多、食肆多，話佢係另外一個小吉隆坡一D都唔夸張。就講IOI Boulevard呢棟建筑物，其實地方唔係話好大，但所有知名酒吧都堆曬係度- Overtime，Library，HomeBar，各自霸占大厦的一個角位，而第四個角位，亦都係最後一個風水地就在最近被来自馬六甲的地理學家（The Geographer Adventure）霸占埋。哈哈~4大門派從此就在呢片土地鬥生鬥死！:)

賣點（1）：最新3D投影機- 無論睇波或睇動物都一樣咁清楚，視覺效果非常好，而其他酒吧仍用著蒙查查的傳統投影機。

其實我們都知道自己係謙虚的孩子，明白做人要低调的道理，但有時候會突然反叛或選擇性去反叛咁做出一D明知唔好而又好LC的行為，就好似以上呢張照片咁...GT叫大家将酒杯擺在ipad上面做杯墊，然後影張相syok sendiri （自己爽），哈哈～係咪好乞人憎？我都覺得我們好無聊兼show off，但其實又唔係乜大件事，唉~心理開始唔正常。

賣點（2）：聯合國餐牌- 無論主菜、小食或啤酒都有好多選擇，最啱好似我呢種咁棘手的客人。

用樹枝装飾的DJ檯。

賣點（3）：復古+大自然+創意的概念- 給人一種輕松不“海鲜”的感覺，而VIP區亦設有一張pool檯。

賣點（4）：舒適寫意VIP區- 没有一般长型假皮梳化（好似唱K咁），没有見唔得光嘅環境（黑到只見到棚牙），呢度的家俬同擺設都充满艺术氣息，幾乎每一張檯凳都有唔同的設計，而且燈光充足。VIP區同普通區只用透明玻璃隔開，相信喜歡扮飲醉酒的朋友都會檢點D。XD

我的廣府炒 (RM11)！（唔該唔好偷偷望著我，我知道係呢度食咁嘅嘢好似好奇怪，但餐牌上真係有呢樣嘢啊，你去睇餐牌喇，唔好望過嚟）米粉炸得好靓，餡汁味道亦OK，不過唔够热，好似冇乜火候。酒吧賣酒就好喇，唔好學人賣炒粉。

MengQ的蘑菇湯- 我唔明白點解要用碟嚟装湯？！好容易摊凍嘎！湯一旦唔热就變得難飲，尤其係呢蘑菇忌廉湯。

Gary今日好豪咁點咗全場最貴的鵝肝酱牛扒- 肉質一般，味道唔错，但同樣唔够热。

鹹蛋炸墨魚圈- 難食！炸得不乾透，所以D油吸曬入麵粉裡面。:S

The Geographers Adventure Restaurant & Bar 地理學家

ADD: A-G-38, Jalan Kenari 5, IOI Boulevard, 47170 Puchong, Selangor.

BUSINESS HOURS: 1pm- midnight

20110905

SATE BALI 不容错過的巴厘沙爹

印尼巴厘島是一個所有喜歡陽光舆海滩的朋友都嚮往的渡假勝地，亦是新婚夫婦們理想的蜜月天堂。而對我而言，巴厘島係一個令我十分難忘的地方，肉麻故事我就唔講喇，不過有樣嘢我可以同大家分享的就係巴厘沙爹喇！我知道有些朋友可能會話大馬的加影沙爹够出名好味喇，點解我係都要話外國的月亮特别圓？！:P 其實我都以我國的沙爹為榮嘎，只不過論口感同香味就好似輸咗"少少"（我唔敢講多，免得得罪自己人）俾巴厘沙爹囖 ~ XD

想知道巴厘沙爹點解可以戰勝馬来沙爹？請往下看。