20111104

CHEF LIM ORGANIC KITCHEN 中西日泰有機餐

好多人對“有機餐”的感覺都唔係咁好,覺得係病人,老人家或食素之人的食物。除咗菜都係菜,清淡都不得了,對于喜歡品嘗新口味的年青人更加係聞之丧胆。不過如果有機餐係一碗冬炎米粉,一碟泰式菠蘿炒飯,一個比薩,一碟咖哩焗飯,一碟日式烏冬麵,一碟福建麵...咁其實有機餐都唔係咁恐怖。:)



上個星期我就带喜歡食有機餐的媽咪嚟位于舊吧生路Scott Garden裡面的Chef Lim Organic Kitchen 食晏。呢度的食物選擇相當廣泛,有齊中、西、日、泰四式的美食,所以可以满足各種唔同年龄同口味的朋友。

橙、黄、白的配搭就如鲜橙与檸檬般給人一種清新舒適的感覺。餐館的面积相當大,要搞個百人有機派對絕不成問題。:)
每個餐桌上都有一個小假植物擺設,上面的紙牌仔寫著一句充满意思的名言:
“你不需煮花巧或複雜的傑作,只需係由新鲜食材做成的好食物。
有機餐館當然唔少得有機食品囖~不過大致上同其他有機專賣店或素食館的選擇咁上下,未能引起我的購買慾。:P
優雅的白色檯凳,簡約的設計概念,令人完全忘了一般有機餐館或素食館老土兼沉悶的形象。在这裡食有機餐就如在某英式咖啡屋嘆下午茶一樣咁舒服自在。:)


首先前菜有日式三色甜腐皮 (Mixed Inari RM 7.90), 一個非常新鲜又開胃的組合。無論係日本海带,薯仔沙律亦或紫菜餡都一樣咁正,再添加少许芥末及酱油就變得更加之出色。如此健康好味的食材,作為减肥餐單都係一個唔错的選擇噢~

同海蜇一樣咁爽口的海带,咬第一口時就已經令我覺得好過瘾!XD 食完凍冰冰的日式前菜,係時候嚟一碗热辣辣的泰式冬炎湯暖下胃。Chef Lim 的椰子冬炎湯 (Coconut Tom Yam RM17.90)係我有史以来在有機素食餐館食過最好味的冬炎! 呢度的冬炎湯唔係热水加斋冬炎酱,幾条菜同幾片鲍鱼菇咁敷衍,而係落足材料煮成嘎!随便一捞就有椰肉,蘑菇,豆腐,白菜,鲍鱼菇,炸豆腐乾,紅籮蔔,香茅...份量够大方,二至四人享用都唔成問題。如此“有料”的冬炎湯,味道方面當然唔會輸蝕,酸辣適中,香濃醒胃,送飯一流。大力推薦俾所有注重健康飲食的冬炎迷。非常新鲜的椰肉,口感可以媲美墨鱼嘎! XD 品嘗完泰式菜,就試一試道地的中菜- 客家釀豆腐 (Hakka Claypot Beancurd- RM13.90)。第一眼見到呢鍋嘢送上的時侯仲以為係侍應搞错咗,因為横睇掂睇都唔似係釀豆腐,更加唔似係客家式的釀豆腐,不過再次参考返餐牌上的圖片之後,就确認了係真的“釀豆腐”,真係食物不如其名。Ok,呢所謂的釀豆腐其實並没有釀料白豆腐,不過就有炸豆腐,蘑菇,西蘭花,鲍鱼菇,腐竹,甜豆,辣椒乾...基本上似一個雜菜煲多過似客家釀豆腐。站在釀豆腐的角度嚟睇,佢係一個敗作,但若然站在雜菜煲的角度,佢係一個相當好味的餸菜,材料新鲜,餡汁清甜中带有些少腐乳的辣味,老人家應該幾喜歡。



該热食的食物一定要够热才好味,所以此做法係非常值得鼓勵嘎~like

九層塔炒米粉 (Fried Vermicelli with basil- RM13.90),賣相够吸引,味道ok,不過米粉唔係“炒”嘅,而係“乾捞”,可能師傅係炒嘅時後落太多水,所以搞到米粉本身有點湿並且失去彈性,一啲鍋气同香味都無。

媽咪係一個有機飲食爱好者。

Scott Garden 四周的環境充满绿意又凉爽,係城中另一個飲食的新热點。




Chef Lim Organic Kitchen

ADD: Lot2-47-2-49, The Scott Garden, 4 1/2 Miles, Jalan Klang Lama, 58100 Kuala Lumpur.

TEL: 03.7982.3395



No comments

Post a Comment

Related Posts Plugin for WordPress, Blogger...

Estica ALL RIGHTS RESERVED © - Powered by Blogger